शंकर पोखरेलको दाबी: विगतको नजिरका आधारमा संसद पुनःस्थापना हुने सम्भावना बलियो

काठमाडौं — नेकपा (एमाले)का महासचिव शंकर पोखरेलले वर्तमान राजनीतिक परिस्थितिमा संसद पुनःस्थापना हुने सम्भावना अझ बलियो भएको बताएका छन्। उनले विगतमा सर्वोच्च अदालतले दिएको नजिरले यसपटक पनि समान निर्णय आउने विश्वास व्यक्त गरे। पोखरेलले सोमबार प्रेस चौतारी नेपालले आयोजना गरेको पत्रकार सम्मेलनमा बोल्दै विघटन गर्ने अधिकार नै नपाएको सरकारले लिएको कदम संवैधानिक मान्यता पाउने सम्भावना नगण्य रहेको बताए।

उनका अनुसार, “बहुमतको सरकार हुँदा समेत अदालतले विघटन असंवैधानिक ठहर गरेको थियो। अहिले त जनता र संसद्ले नचिनेको सरकारले विघटन गरेको छ। त्यसलाई वैध ठहर गर्ने आधार नै छैन।” महासचिव पोखरेलले सर्वोच्च अदालतले संविधानको मर्म र जनताको प्रतिनिधित्वको सम्मान गर्ने विश्वास व्यक्त गरे।

उनले भने, “संविधान र लोकतान्त्रिक अभ्यासको रक्षा गर्ने निकायको रूपमा अदालतले विगतमा देखाएको स्थिरता अहिले पनि कायम रहनेछ भन्ने हाम्रो विश्वास हो।” पोखरेलले राजनीतिक दलहरूले आपसी द्वन्द्वभन्दा पनि संवैधानिक सीमाको सम्मान गर्नुपर्ने आवश्यकता औंल्याए। उनका अनुसार, संसद विघटनको कदमले लोकतन्त्रको आधारलाई कमजोर बनाउने खतरा बढाएको छ, र त्यसको अन्त्य पुनःस्थापनामार्फत् मात्र सम्भव छ।

तपाईंको प्रतिक्रिया