राम कार्कीको आत्मस्वीकारोक्ति: हाम्रो पुस्ताले नालायक नेतृत्वलाई प्रतिस्थापन गर्न सकेन

ललितपुरमा आयोजित पत्रकार सम्मेलनमा नेकपा (माओवादी केन्द्र) का वरिष्ठ नेता राम कार्कीले नेपालको वर्तमान राजनीतिक अवस्थाप्रति गहिरो असन्तुष्टि जनाए। उनले स्पष्ट रूपमा भने, “हाम्रो पुस्ताले नालायक नेतृत्वलाई प्रतिस्थापन गर्न सकेन। यही हाम्रो असफलता हो।” उनका अनुसार, देशको कम्युनिष्ट आन्दोलन वैचारिक दिशाहीनता र व्यक्तिगत स्वार्थमा सीमित बन्दै गएको छ।

उनले जनताले विश्वास गुमाएको बताउँदै भने, “जनताको नजरमा पार्टीहरू अब केवल केही व्यक्तिका संगठनमा सीमित भएका छन्।” कार्कीले राजनीतिक दलका नेताहरूमा फैलिएको भ्रष्टाचारलाई मुल कारणका रूपमा प्रस्तुत गरे। उनले जनरेशन-जी (Gen-Z) युवाहरूले उठाएका आवाजलाई वास्तविक परिवर्तनको संकेत बताउँदै भने,

“युवाहरूले भ्रष्टाचार अन्त्य गर्न माग गरिरहेका छन्, तर आरोपित नेताहरू नै ठूलो पदमा पुगेर एकताको नाटक मञ्चन गरिरहेका छन्।” उनले थपे, “भ्रष्टाचारका मुद्दा लागेकाहरूले ‘एकताको स्वाङ’ गरेर राजनीति गर्ने प्रवृत्तिले आन्दोलनको आत्मा नै कमजोर बनाएको छ।”

नेता कार्कीले अब दलभन्दा माथि उठेर मजदुर, किसान र गरिबहरूको सहअस्तित्वमा आधारित समाजवादी संगठन निर्माण गर्ने लक्ष्य रहेको बताएका छन्। उनले भने, “हामी दल बनाउने होइन, समाज रूपान्तरण गर्ने यात्रामा छौं।” कार्कीका अनुसार, अबको राजनीतिक अभियान वैचारिक शुद्धता, पारदर्शिता र युवा सहभागितामाथि केन्द्रित हुने छ।

तपाईंको प्रतिक्रिया