दोहाको विश्व सम्मेलन सकेर राष्ट्रपति रामचन्द्र पौडेल स्वदेश फर्किँदै
राष्ट्रपति रामचन्द्र पौडेल आज अपराह्न कतारको राजधानी दोहा भ्रमण पूरा गरी स्वदेश फर्कँदै छन्। राष्ट्रपति पौडेलले दोहामा आयोजित “सामाजिक विकासका लागि दोस्रो विश्व शिखर सम्मेलन” मा नेपालका तर्फबाट सहभागिता जनाएका थिए। चारदिने उक्त सम्मेलनको मुख्य सत्रलाई उनले गत मङ्गलबार सम्बोधन गर्दै नेपालले सामाजिक न्याय, समावेशी विकास र रोजगारी विस्तारका क्षेत्रमा अघि बढाएको अनुभव प्रस्तुत गरेका थिए।
सम्मेलनमा सहभागी नेताहरूले गरिबी निवारण, उत्पादनमुखी रोजगारी र सबैका लागि मर्यादित कामका विषयमा उच्चस्तरीय छलफल गरेका थिए। राष्ट्रपति पौडेलले विशेषगरी युवाहरूका लागि सीपमूलक तालिम र सामाजिक सुरक्षा विस्तारमा नेपालको नीति तथा अभ्यास साझा गरेका थिए।
कतारमा बसाइका क्रममा उनले विभिन्न मुलुकका प्रतिनिधिसँग द्विपक्षीय कुराकानी गर्दै सामाजिक विकासका क्षेत्रमा सहकार्य बढाउने विषयमा पनि छलफल गरेका थिए। राष्ट्रपति पौडेलको भ्रमणले अन्तर्राष्ट्रिय मञ्चमा नेपालको पहिचान र प्रतिबद्धता थप मजबुत हुने अपेक्षा गरिएको छ।
