अब्दुल सत्तारको प्रश्न– महाधिवेशन नगरी कांग्रेस गाउँ पस्न कसरी सक्षम हुन्छ?
काठमाडौं — नेपाली कांग्रेसका केन्द्रीय सदस्य अब्दुल सत्तारले आसन्न निर्वाचनमा सफलता प्राप्त गर्न पार्टीले महाधिवेशनमार्फत कार्यकर्ताको मनोबल उच्च बनाउनुपर्ने सुझाव दिएका छन्। बुधबार बसेको केन्द्रीय समिति बैठकमा बोल्दै उनले भने, “हामीले चुनावमा नजाने भन्ने कुरा नै छैन। तर तयारीविना चुनावमा जानु अर्थहीन हुन्छ।
पहिले कार्यकर्तालाई ऊर्जावान बनाउनुपर्छ, त्यसपछि मात्रै देशभरका मतदातासामु आत्मविश्वासका साथ जान सकिन्छ।” उनको भनाइमा, महाधिवेशनले पार्टीभित्र ऊर्जा र विश्वास पुनःस्थापित गर्न मद्दत गर्नेछ। “निर्णयहरू केवल पार्टी कार्यालयभित्र सीमित हुनु हुँदैन,” उनले जोड दिए, “केन्द्रीय सदस्यहरू गाउँघर पुगून्, जनतामाझ जाऊन् र वास्तविक अवस्था बुझून्, तब मात्रै चुनावको कुरा सान्दर्भिक हुन्छ।”
सत्तारले माइतीघर मण्डलमा टाँगिएका नेताहरूका पोस्टरबारे पनि व्यंग्य गर्दै भने, “एक महिनाभन्दा बढी पोस्टर टाँगिएर रह्यो, तर हाम्रो युवातहका नेताहरूले पनि त्यो हटाउन सकेनन्। यो त हाम्रो कार्यशैलीको प्रतिविम्ब हो।” बैठकमा महामन्त्री गगन थापाले पेस गरेका १० एजेन्डामध्ये मुख्य छलफल चुनावअघि महाधिवेशन गर्ने वा नगर्ने विषयमै केन्द्रित भएको उनले बताए।
“हामी अझै पनि एजेन्डामै अड्किएका छौं, व्यवहारमा पुग्न सकेका छैनौं,” उनले टिप्पणी गरे। सत्तारको भनाइअनुसार, कांग्रेसले महाधिवेशनमार्फत संगठन सुदृढ पार्दै चुनावी तयारीमा अघि बढे मात्र आगामी निर्वाचनमा सशक्त उपस्थितिको सुनिश्चितता गर्न सक्छ।
