रास्वपाको आजको केन्द्रीय समिति बैठक: १० मुख्य एजेन्डामा रणनीतिक छलफल
राष्ट्रिय स्वतन्त्र पार्टी (रास्वपा) आज दिउँसो महत्वपूर्ण केन्द्रीय समितिको बैठक बस्दैछ। पार्टी कार्यालय चःमतिमा दिउँसो २ बजे तय गरिएको बैठकमा समसामयिक राजनीतिक परिस्थिति र पार्टीभित्र चलिरहेका रणनीतिक तयारीबारे विस्तृत छलफल हुनेछ।
प्रवक्ता मनिष झाले जानकारी दिएअनुसार, बैठकको सुरुआत सभापति रवि लामिछाने सम्बन्धी चलिरहेको मुद्दाको कानुनी अद्यावधिकसहित संवाद तथा सहकार्य अभियानबारे ब्रिफिङबाट हुनेछ। यसअघि सम्पन्न केन्द्रीय समितिको विस्तारित बैठकमा उठेका विषय र प्रतिवेदनको आज पुनर्मूल्यांकन हुनेछ। आवश्यक परिमार्जनसँगै उक्त प्रतिवेदन अनुमोदन गर्ने एजेन्डा बैठकको मुख्य भागमा रहेको छ।
रास्वपाले चुनावी तयारीलाई सुदृढ बनाउन विभिन्न कार्यदल विस्तारका एजेन्डा अघि सारेको छ।
-
उपसभापति स्वर्णिम वाग्ले नेतृत्वमा रहेको चुनावी वाचापत्र कार्यदलमा नयाँ सदस्य थप्ने तयारी चलिरहेको छ।
-
संविधान संशोधनका विषयमा सुझाव संकलन गर्न छुट्टै संविधान परिमार्जन कार्यदल गठन गर्ने निर्णय आजकै बैठकबाट हुने अपेक्षा गरिएको छ।
-
आगामी निर्वाचनसम्म दैनिक मिडिया गतिविधि विश्लेषण गर्ने उद्देश्यले मिडिया अध्ययन कार्यदल बनाउने प्रस्ताव पनि छ।
कार्यदलहरूले केन्द्रमा नियमित ब्रिफिङ गर्ने, आवश्यकता अनुसार घटना–विशेष विश्लेषण प्रस्तुत गर्ने र केन्द्रीय समितिलाई समय–समयमा अद्यावधिक गराउने योजना बनाइएको छ।
रास्वपा विभिन्न राजनीतिक शक्ति, समूह र दलहरूको क्रियाकलाप निरन्तर अध्ययन गर्ने राजनीति अध्ययन कार्यदल गठनतर्फ पनि अघि बढ्दैछ। यसको जिम्मेवारी राजनीतिक परिवेशको विश्लेषण, केन्द्रमा प्रतिवेदन प्रस्तुत गर्ने र पार्टीलाई रणनीतिक सुझाव प्रवाह गर्ने रहनेछ।
आठौँ एजेन्डामा उम्मेदवार छनौट सिफारिस समिति विस्तारको प्रस्ताव राखिएको छ। सोही क्रममा रूपन्देही–३ का लागि डा. लेखजंग थापाको उम्मेदवारीबारे थप छलफल अपेक्षित छ। रास्वपाले युवालाई लक्षित ‘जेन–जी अभियान’ सञ्चालन गर्ने तयारी गरेको छ। अभियानका उद्देश्य, संरचना र कार्यविधिबारे आजको बैठकले ठोस योजना बनाउने बताइएको छ।
