उपमहासचिवको प्रतिस्पर्धामा राजेन्द्र गौतम, स्वतन्त्र उम्मेदवारीको घोषणा

नेकपा एमालेका प्रचार विभाग प्रमुख राजेन्द्र गौतमले उपमहासचिव पदमा उम्मेदवारी दिने घोषणा गरेका छन्। ओली समूहभित्रै यस पदका लागि प्रतिस्पर्धा तीव्र बन्दै गएपछि पार्टीको आन्तरिक राजनीतिमा नयाँ गतिशीलता देखिएको छ।

नेकपा एमालेको आसन्न महाधिवेशनले नयाँ मोड लिँदै गर्दा प्रचार विभाग प्रमुख राजेन्द्र गौतमले उपमहासचिव पदमा प्रतिस्पर्धा गर्ने घोषणा गरेका छन्। पार्टी अध्यक्ष केपी शर्मा ओलीसँग नजिक मानिने गौतम यसअघि पदाधिकारी सूचीमा नसमेटिएपछि उनले उम्मेदवारी दिने निर्णय लिएका हुन्।

नेतृत्व तहसँग लामो छलफलपछि आफू चुनावी प्रतिस्पर्धामा उत्रिने निष्कर्षमा पुगेको गौतमले बताएका छन्। उनका अनुसार सहमतिको सम्भावना नरहेमा चुनावी प्रक्रियामार्फत आफ्नो दाबी प्रस्तुत गर्ने तयारी गरिएको छ। “नेतृत्वसँग खुलेर छलफल भयो। यदि निर्वाचन हुने अवस्था आयो भने म उपमहासचिव पदका लागि उम्मेदवार हुनेछु,” गौतमले भने।

ओली समूहबाट यसअघि नै उपमहासचिव पदमा रघुवीर महासेठ, विष्णु रिमाल र लेखराज भट्ट उम्मेदवारीको तयारीमा छन्। अब गौतमको प्रवेशसँगै उक्त पदका लागि ओली पक्षभित्रै प्रतिस्पर्धा अझ रोचक हुने देखिएको छ। पार्टीभित्रको शक्ति सन्तुलन र भावी नेतृत्व संरचनामा उपमहासचिव पदलाई महत्वपूर्ण मानिने भएकाले यस पदको चुनावले एमालेको आन्तरिक राजनीतिमा खास प्रभाव पार्ने विश्लेषकहरूको भनाइ छ।

तपाईंको प्रतिक्रिया

Facebook Messenger Viber WhatsApp Email