कांग्रेसको पटक–पटक सारिएको केन्द्रीय समिति बैठक आज निर्णायक मोडमा
नेपाली कांग्रेसले पटक–पटक स्थगित हुँदै आएको केन्द्रीय समिति बैठक आज फेरि बस्दैछ। दिउँसो २ बजे सुरू हुने बैठकले पार्टीभित्र केही समयदेखि बल्झिँदै आएको विवाद समाधानतर्फ मार्गनिर्देशन खोज्ने अपेक्षा छ। सोमबारका लागि तय भएको बैठक सहमति नजुटेपछि आजका लागि सारिएको थियो।
असोज २८ गतेदेखि निरन्तररूपमा चलिरहेको छलफलले कुनै निर्णयमा पुग्न नसकेपछि नेतृत्वले फेरि एकपटक सबै केन्द्रीय सदस्यलाई भेला गराउन लागेको हो। पार्टीभित्रको मुख्य विवाद महाधिवेशनको समयलाई लिएर रहेको छ।
-
सभापति शेरबहादुर देउवानिकट समूह चुनावपछि, सम्भवतः बैशाखमा महाधिवेशन गर्नु उपयुक्त ठानिरहेको छ।
-
तर महामन्त्री गगन थापा र उप–महामन्त्री विश्वप्रकाश शर्मा भने नियमित महाधिवेशन हुन नसके पनि चुनावभन्दा अघि विशेष महाधिवेशन गरेर अघि बढ्नुपर्ने पक्षमा छन्।
यही दुई धारबीचको तानातानका कारण केन्द्रीय समितिबाट एकमत निर्णय निकाल्न नेतृत्वमाथि थप दबाब बढेको छ। सिंगापुरबाट उपचार गराई फर्किएपछि सभापति देउवाले पार्टीभित्र बढ्दै गएको मतभेद न्युनिकरणका लागि सक्रिय भूमिका खेल्दै आएका छन्। उनले गत शनिबार र आइतबार शीर्ष नेताहरूसँग अनौपचारिक छलफलसमेत गरेका थिए। तर अपेक्षित सहमति जुट्न नसकेको कारण सोमबारको बैठक सारेर आजका लागि पुनः बोलाइएको हो।
