जिम्मेवारीमा फर्किए अनेरास्ववियु अध्यक्ष डा. सुजन कडरिया
नेकपा (एमाले) को विद्यार्थी संगठन अनेरास्ववियुका अध्यक्ष डा. सुजन कडरिया पुनः सक्रिय जिम्मेवारीमा फर्किएका छन्। एमालेले सुरु गरेको ‘घर फर्क अभियान’पछि उनले आफ्नो नेतृत्व भूमिकामा फर्कन सजिलो भएको बताएका छन्।गत भदौ २३ गते ‘जेनजी आन्दोलन’का क्रममा आन्दोलन हिंसात्मक बन्दै जाँदा विद्यार्थीको मृत्यु भएपछि डा. कडरियासहित केही नेताहरूले भावनात्मक रूपमा पदबाट राजीनामा दिएका थिए।
त्यसबेला संगठनभित्र पनि मतभेद र असन्तुष्टि बढेको थियो, जसअन्तर्गत केही सदस्यहरूले उनको कार्यकक्षमा रहेको नेमप्लेटसमेत हटाएका थिए। कडरियाले भने, “त्यो घटना हाम्रो लागि गहिरो घाउ थियो। विद्यार्थीको रगत देख्दा हामी सबै आहत भयौं। तर संकटको घडीमा संगठन नेतृत्वविहीन हुन नहुने भनेर देशभरका साथीहरूले आग्रह गरेपछि जिम्मेवारीमा फर्किने निर्णय गरेँ।”
उनले अहिले अनेरास्ववियुका सबै कार्यकर्तालाई एकताबद्ध भएर अघि बढ्न आग्रह गरेका छन्। “संगठनमा जुन असन्तुष्टि थियो, त्यसलाई संवाद र सहकार्यबाट सम्बोधन गर्न सकिन्छ,” उनले भने। डा. कडरिया गत जेठमा सम्पन्न अधिवेशनमार्फत अध्यक्षमा निर्वाचित भएका थिए। उक्त अधिवेशनले पहिलो पटक ३२ वर्षे उमेरसीमा तोकेको थियो। उनले आफ्ना प्रतिस्पर्धी प्रकाश पौडेललाई ७ मतले पराजित गर्दै अध्यक्ष पद जितेका थिए।
