मतदानमा ८० वटा विद्युतीय भोटिङ मेसिन प्रयोग गरिने

नेकपा (एमाले)को ११ औं राष्ट्रिय महाधिवेशनअन्तर्गत हुने निर्वाचनमा विद्युतीय भोटिङ मेसिनको तयारी ढिलो भएपछि मतदान समय सारिएको छ। उम्मेदवारको अन्तिम सूची ढिलो प्राप्त हुँदा कोडिङ प्रक्रिया चलिरहेकाले मतदान मंगलबार अपराह्नदेखि सुरु हुने भएको हो।

नेकपा (एमाले)को ११ औं राष्ट्रिय महाधिवेशनअन्तर्गत तय गरिएको निर्वाचन प्रक्रिया मंगलबारदेखि औपचारिक रूपमा अघि बढ्ने भएको छ। पार्टीले तीन दिनमै महाधिवेशन सम्पन्न गर्ने योजना बनाएको भए पनि पदाधिकारी र केन्द्रीय समितिका पदमा प्रतिस्पर्धा हुने निश्चित भएपछि कार्यक्रम केही लम्बिने देखिएको छ।

निर्वाचन कार्यक्रमअनुसार मतदान अपराह्न ४ बजेदेखि सुरु गर्ने तयारी गरिएको छ। यसअघि मतदान बिहान ११ बजेदेखि साँझ ६ बजेसम्म सञ्चालन गर्ने भनिए पनि प्राविधिक कारणले समय सारिएको हो। पार्टीले यस महाधिवेशनमा पनि रामलक्ष्मण इनोभेसन प्रालिले निर्माण गरेको विद्युतीय भोटिङ मेसिन प्रयोग गर्दैछ।

कम्पनीका प्राविधिक लक्ष्मण रिमालका अनुसार उम्मेदवारको अन्तिम नामावली ढिलो प्राप्त भएकाले मेसिनमा फोटो र विवरण प्रविष्ट गर्ने काम बिहानैदेखि चलिरहेको छ। उम्मेदवारको विवरण कोडिङ र सूचीकृत गर्न अपराह्नसम्म समय लाग्ने भएकाले तोकिएको बिहानको समयमै मतदान सम्भव नभएको उनले बताए।

यसपटक कुल ८० वटा विद्युतीय भोटिङ मेसिन प्रयोग गरिनेछ। मतदान प्रक्रियामा एक प्रतिनिधिलाई भोट हाल्न औसत ३५ देखि ४० मिनेटसम्म समय लाग्ने अनुमान गरिएको छ। महाधिवेशनमा देशभरका भूगोल र गैरभूगोल क्षेत्र, आयोजक, विभाग, निकाय तथा मनोनीतसमेत गरेर जम्मा २ हजार २६२ प्रतिनिधि सहभागी छन्।

सबै प्रतिनिधिको मतदान सकिएपछि मात्रै नतिजा आउने भएकाले निर्वाचन प्रक्रिया केही समय लिने देखिन्छ। यसरी, एमाले महाधिवेशनको चुनावी माहोल उत्साहपूर्ण भए पनि प्राविधिक तयारीका कारण मतदान समय पछाडि धकेलिएको हो।

तपाईंको प्रतिक्रिया

Facebook Messenger Viber WhatsApp Email