रिजालको प्रस्ताव: चार महिनाका लागि कांग्रेस नेतृत्व दुई महामन्त्रीलाई देऊ
काठमाडौं — नेपाली कांग्रेसका वरिष्ठ नेता मीनेन्द्र रिजालले पार्टीको नेतृत्वमा नयाँ शैलीको प्रयोग गर्नुपर्ने सुझाव दिएका छन्। उनले आसन्न निर्वाचनलाई लक्षित गर्दै कम्तीमा आगामी चार महिनाका लागि पार्टी सञ्चालन र टिकट वितरणको जिम्मा दुई महामन्त्रीहरूलाई सुम्पिन आग्रह गरेका छन्।
रिजालले हालको नेतृत्व स्वरूपमा कांग्रेसले चुनाव जित्ने सम्भावना न्यून रहेको भन्दै नयाँ दृष्टिकोण आवश्यक रहेको टिप्पणी गरे। “दुई महामन्त्रीहरूलाई जिम्मा देऊ, उनीहरूले ढंगले काम गरे कांग्रेस उठ्छ,” उनले केन्द्रीय समिति बैठकमा भने।
रिजालका अनुसार, पार्टी नेतृत्वले महामन्त्रीहरूलाई अस्थायी रूपमा सम्पूर्ण जिम्मेवारी दिएर चार महिनासम्म ‘परीक्षणकालीन नेतृत्व’ चलाउन सक्ने व्यवस्था गर्नुपर्छ। “त्यो अवधिमा जिते भने उनीहरूलाई सलाम गर्नुपर्छ, नत्र जिम्मेवारी फिर्ता गर्नुपर्छ,” उनले भने। रिजालले सभापतिबाट मात्र सबै दोष देख्ने प्रवृत्तिको पनि आलोचना गरे र सामूहिक निर्णय प्रक्रियालाई सशक्त बनाउनुपर्नेमा जोड दिए।
बैठकमा बोल्दै उनले संसदको वैधानिकता र म्यान्डेटका विषयमा पनि खुला बहस गर्नुपर्ने बताए। “यदि संसदले म्यान्डेट गुमाएको छैन भने आन्दोलन किन भयो? म्यान्डेट गुमाएको हो भने नयाँ जनादेशका लागि अघि बढ्नुपर्छ,” उनले भने।
उनले कांग्रेसलाई स्पष्ट राजनीतिक र नैतिक धारणा लिन आग्रह गर्दै एमालेसँग संवाद वा प्रतिस्पर्धा — दुवै अवस्थामा एकमत हुनुपर्ने बताए।
रिजालले पार्टीको नियमित महाधिवेशन समयमै गर्नुपर्नेमा जोड दिए। “यदि नेतृत्वले फेरि कार्यकाल बढाउने प्रयास गर्छ भने विशेष महाधिवेशनको बाटो लिनुपर्छ,” उनले चेतावनी दिए। उनका अनुसार, नेतृत्वको उत्तरदायित्व संस्थागत बनाउने र आन्तरिक लोकतन्त्र पुनःस्थापित गर्ने समय आएको छ।
