आन्तरिक असन्तुष्टिबीच समाजवादी दुई धारमा, झलनाथ खनाल पक्ष आज छुट्टै भेला हुँदै
काठमाडौं — नेकपा (एकीकृत समाजवादी)भित्रको आन्तरिक मतभेद अब निर्णायक चरणमा पुगेको छ। पार्टी नेतृत्व र नीति-दिशा प्रति असन्तुष्ट समूहले आज काठमाडौंमा छुट्टै भेला आह्वान गरेपछि विभाजनको अवस्था सुनिश्चित भएको छ। पार्टीको केन्द्रीय समितिले केही दिनअघि नेकपा (माओवादी केन्द्र)सहितका वाम घटकहरूसँग एकता गर्ने निर्णय गरेपछि झलनाथ खनाल नेतृत्वको पक्ष असन्तुष्ट बनेको हो।
खनाल पक्षका अनुसार पार्टीले सांगठनिक सुदृढीकरण र आन्तरिक पुनर्गठन नगरी एकतामा जानु असमयको निर्णय हो। शनिबार दिउँसो सुकेधारास्थित एक पार्टी प्यालेसमा खनाल समूहले भेला बोलाएको छ। भेलामा वरिष्ठ नेता घनेन्द्र बस्नेत, महासचिव घनश्याम भूसाल, स्थायी कमिटी सदस्य रामकुमारी झाँक्री, जीवनराम श्रेष्ठ र विजय पौडेल लगायत सयभन्दा बढी केन्द्रीय सदस्य सहभागी हुने तयारी गरिएको छ।
खनाल पक्षका नेताहरू लामो समयदेखि माओवादी केन्द्रसँग एकता गर्न नहुने पक्षमा रहेकाहरू हुन्। उनीहरूका अनुसार, “पहिले पार्टीभित्र आत्मसमिक्षा र संगठनको आधार बलियो बनाइएपछि मात्रै वाम एकता अर्थपूर्ण बन्न सक्छ।” यो विवाद पार्टी अध्यक्ष माधवकुमार नेपालमाथि बढ्दो दबाबको बीचमा आएको हो।
पतञ्जली जग्गा प्रकरणमा अख्तियार दुरुपयोग अनुसन्धान आयोगले नेपालविरुद्ध भ्रष्टाचार मुद्दा दायर गरेपछि नैतिकताको आधारमा उनको राजीनामा माग उठेको थियो। ‘जेन-जेड आन्दोलन’पछि अन्य दलहरूले नेतृत्व पुनर्गठनका कदम चालिरहेका बेला समाजवादीमा पनि परिवर्तनको माग तीव्र बनेको थियो।
तर, अध्यक्ष नेपालले पार्टीभित्र सुधारभन्दा पनि माओवादी केन्द्रसँग एकता प्रक्रियालाई प्राथमिकता दिएका कारण असन्तुष्ट समूह झन् टाढिएको आरोप खनाल पक्षले लगाएको छ। अब समाजवादी पार्टी दुई धारमा स्पष्ट बँडिएको छ — एक, माओवादी केन्द्रसँग तत्काल एकता गर्नुपर्ने पक्ष; र अर्को, संगठन बलियो बनाएर पछि मात्र एकताको बाटो रोज्ने पक्ष।
राजनीतिक विश्लेषकहरूका अनुसार, आजको भेला समाजवादी पार्टीको भविष्य निर्धारण गर्ने निर्णायक मोड हुन सक्छ। अन्तिम क्षणसम्म सहमतिको प्रयास भइरहे पनि, दुबै पक्षबीचको वैचारिक र नेतृत्वगत दूरी यति बढिसकेको छ कि पार्टी एकताको सम्भावना अत्यन्तै क्षीण देखिन्छ।
