निर्वाचन आयोगको तथ्यांकः देशभर थपिए २ लाख ९ हजार नयाँ मतदाता

काठमाडौँ — निर्वाचन आयोगले देशभर नयाँ मतदाता दर्ता अभियानअन्तर्गत हालसम्म २ लाख ९ हजार ५५२ जना नयाँ मतदाता सूचीकृत गरिएको जनाएको छ। मंगलबार मात्रै २३ हजार ६३८ जनाले नाम दर्ता गराएका छन्। तिनमध्ये १३ हजार ६६ जना पुरुष, १० हजार ५६७ जना महिला, र ५ जना अन्य लिङ्गका मतदाता रहेको आयोगले जनाएको छ।

दर्ता अभियान सुरु भएयता १ लाख २२ हजार ७४० पुरुष, ८६ हजार ७८५ महिला, र २७ जना अन्य लिङ्गका नागरिकले आफ्नो नाम नयाँ मतदाता सूचीमा थपाएका छन्। आयोगका अनुसार ग्रामीण क्षेत्रदेखि सहरसम्म उत्साहजनक सहभागिता देखिएको छ, विशेषगरी युवा पुस्ताको संलग्नता उल्लेखनीय रहेको छ।

हाल मतदाता दर्ताको अन्तिम म्याद कात्तिक ३० गते तोकिएको छ। तर विभिन्न जिल्लामा देखिएको अत्यधिक चाप र प्राविधिक समस्यालाई मध्यनजर गर्दै सरकारले आयोगलाई म्याद थप्ने सुझाव दिएको छ। निर्वाचन कार्यालयहरूमा भीड बढेपछि आवश्यक परे अतिरिक्त कर्मचारी परिचालन गर्न र दर्ता प्रक्रिया छिटो पार्न निर्देशन दिइएको आयोगले जनाएको छ।

तपाईंको प्रतिक्रिया